الخوف من الحب (الفصل الثالث)

الفصل الثالث
الجزء الاول


بعد ما خلص الفيلم عبد العزيز طلب من سارة انهم يروحوا يناموا ... بدأ الارتباك على سارة والتوتر وابتدت في العياط مرة تانية ....
عبدالعزيز بعصبيه: ما ينفعش كدة .... هي دمعتك عالطول جاهزة ... خلاص مش حالمسك اتبسطي ...
وخرج من الجناح وهو في قمة عصبيته ونرفزته .... بجد متجوز عيلة عالطول تعيط ... هي ناسية انها مراتي ... لامتى حفضل مستحمل يعني ... وخرج برة الفندق يتمشى في الشارع مع ان الوقت متأخر جدا بس هو كان مضايق جدا من تصرفات سارة ...
سارا كانت قاعدة على الكنبة وبتعيط ... بس انا مش قادرة اعمل حاجة غير اني اعيط ...ما قدرش اخليه يعملي حاجة او يلمسني .. ومش قادرة اقوله ... هو اصلا مستعجل ... احنا لسة عرسان ... ومش قادر يصبر ... ومش عارفة ليه متنرفز وعصبي ...وانا ماليش ذنب ... دلوقتي هو راح فين ياربي اعمل ايه انت الوحيد اللي عالم بحالي ...
تعوذت بالله ....ورحت لاوضتي عشان انام ... غيرت هدومي وحاولت انام .... عدت ساعة وانا مش عارفة انام وعبد العزيز لسة ما رجعش ... وبدأت تقلق وتخاف عليه لحسن يكون حصله حاجة .... قامت من السرير ...وراحت تتمشى في الجناح ...مش قادرة تقعد ... وكل دقيقة تبص للساعة ...بعد تقريبا ساعة الا ربع ... سمعت صوت الباب وعلى طول راحت للسرير وتعمل نفسها نايمة ...
عبدالعزيز بعد ما اعصابة هديت شوية ...رجع للفندق... دخل للجناح الي كان هادي وانواره مظلمه .... اكيد الانسه نايمه ...... راح وخد له شور ... ونام على السرير وهو مدي ظهرة لسارة ..
..........
تليفون عبدالعزيز كان بيرن ...يوه هو الازعاج دى عمره ما يخلص......انا ليه ما حطيتش التليفون على السايلنت ....فتح عنيه وشاف الساعه ست ونص الصبح ..الوقت بدري مين اللي برن دلوقتي.....خد موبيله ولقى بومي يتصل بك ...ابتسم مع انه لسة كان صاحي ... ...وفي العادة بيبقى مزاجة متعكر اول ما يقوم ......ورد على التليفون..
عبدالعزيز: انت ما عندكش دم حد يتصل دلوقتي
عمر: ههههههههههههههه ... الله شكل الاخ كان سهران انبارح.... قول السلام عليكم في الاول مش من اولها زفت .
عبدالعزيز: اسال نفسك .... بذمتك احد يتصل الساعه 6 ونص الصبح ..
عمر: وانا ايه اللي اش عرفني الساعه عندكم كام دلوقتي .
عبدالعزيز: هههههههههه ...بجد شكلك فاضي ورايق ..المهم اخبارك..
عمر: على فكرة انا زعلان قوووي ولا تتلكم ولا تسأل عليا ... هياااااااا بنت عمي شوقي نستك اخوك .
عبدالعزيز:اخص عليك .هو انا اقدر انساكم يا.ابو مي عمر:المهم ما علينا ...اخبارك ايه يا عبد العزيز ؟؟؟
عبدالعزيز: والله تمام بخير ...وانت ؟؟
عمر: الحمدلله
عبدالعزيز : هههههههه .... طيب امي اخبارها ايه ؟؟
عمر: امي زعلانة منك بتقول انها ما كلمتهاش من ساعة ما وصلت
عبدالعزيز:هي ميرنا الزفتة دي ما قلتش لامي ان انا اتصلت اول ما وصلت وردت عليا ميرنا ...
عمر: لا ياذكي امي قصدها انك كلمت ميرنا وما كلمتشهاش
عبدالعزيز : ولا يهمها الغاليه ...هي فين دلوقتي جمبك ؟؟؟
عمر: لا والله انا في الشركة .. هو انا زيك نايم في العسل ...
عبدالعزيز: ههههههههه ...الله يقطعك يا عمر
عمر بيتكلم بجد: عبدالعزيز انت مبسوط...؟؟؟؟؟
هنا عبدالعزيز قام وخرج من الاوضة وراح للصاله ....
عبدالعزيز: اااااااااااااه ياعمر لو تعرف ايه اللي جوايا
عمر: ليه ..ايه اللي حصل
عبدالعزيز: لا بس البنت راسها ناشفة ... اعتقد ان اهلها اجبروها على الجواز مني .. وعلى اتفه حاجة تعيط . ...والله انا زهقت ومش عارفة اعمل ايه ..
عمر: يا عبدالعزيز الكلمه الحلوه كويسة برضه ... على فكرة الكلام يقلب عقل البنات .. وانت اصبر معاها وعلى فكرة هي لسة صغيرة وانتوا لسة متجوزين ما مرش على جوازكم اسبوع ... اصبر عليها يا عبدالعزيز
عبدالعزيز: بقولك ايه غير السيرة دي بقى لاني زهقت خلاص
عمر: لا يا عبد العزيز ما ينفعش كدة ... بقولك ايه انت جرب معاها ... انا عرفك انت كويس وبتعرف تتصرف بحكمة...انا عارف انك مطنشها ومش معبرها ...ازاي عايزها تتقبلك وانت مبينلها انك مش قبلها ومش طايقها .
عبدالعزيز: بالعكس ...والله انا مش مطنشها وبهزر معاها وبفسحها بس هي اللي كل دقيقة تعيط .
عمر: انت اصبر عليها بس وشوف ... اه على فكرة منصور صحبك بسلم عليكم وهو كان عايز يتصل بيك بس ما حبش يزعجك في شهر العسل .
عبدالعزيز: الله يسلمه ...لا عادي خليه يتصل
عمر: يالا اتفلق والله انت فاضي ... يالا خسرتني المكالمة ...
عبدالعزيز: انت الي خسرتنى يالا وسلم على امي ...وسلمي على بنتك مي القمر وحشتني عاملة ايه
عمر: انت اتصل بماما وسلم عليها لانها بجد زعلانة منك
عبدالعزيز: طيب حتصل يالا باي
عمر: سلام
وقفل عبد العزيز مع اخوه التليفون .. وراح يشوف سارة قال حيتصل على البيت بعدين عشان سارة تكلمهم تكلم امه .. دخل الاوضة ولقى السرير فاضي ... عرف انها صحيت ..
سارا صحيت لاقت عبد العزيز بيتكلم في التليفون .. بس ماعرفتش بيكلم مين ...وليه طلع بره الاوضة علشان يتكلم وما تكلمش قدامها ليه .. وما فيش حد يتصل في الوقت دى الا اهله .. اكيد دي امه...بعدين قامت وخدت لبسها وراحت للحمام ....بعد ما خلصت طلعت وشافت عبدالعزيز واقف وظهره لها وبيتفرج من الشباك على الي رايح والي جاي في الشارع ....حس بيها بس ما حبش يتلفت لها ..عايز يبين لها انه زعلان ومضايق .... بعدين افتكر كلام اخوه وقال خليني افرحها وابسطها ... لف وشاف سارة وفي وشه ابتسامة كبيرة .....سارا كانت خايفه من ردت فعله ..بس لما شافته بيبتسم اتبسطت قوووي ... وردتله الابتسامة .
عبدالعزيز: يالا ننزل نفطر تحت .. على فكرة فطار الفندق جميل قووووي .
سارا: والله انا ميتة من الجوع ... طيب حالبس بسرعة
عبدالعزيز: اوكي وانا حستناكي
نزلوا تحت يفطروا من البوفيه الي موجود في مطعم الفندق...كان الجو كلاسيكي قوي والقعده حلوة.... سارة انبسطت .. .. وكان باين عليها الفرحة والانبساط
سارا: حنروح فين النهارة ؟؟
عبدالعزيز: ايه رايك نروح هارودز ..
سارا: اوعى تقولي بتاع الفايد ..
عبدالعزيز: ههههههه ...ليه في غيره؟؟
سارا: لا بس كان نفسي اشوفه من زمان من كتر ما الناس كانت بتتكلم عنه ..
عبدالعزيز: خلاص يالا بعد ما نخلص الفطار نروح .
سارا: ياااه....وابتسمت ابتسامه كبيرة وكانت طايرة من الفرح والسعادة
بعد ما طلعوا من الفندق ...عبد العزيز افتكر انه كان ناوي يتصل بامه... وطلع موبيله .... وراح اتصل بامه ...
صلاح: السلام عليكم..
عبدالعزيز: وعليكم السلامه ورحمة الله وبركاته .. ازيك يا بابا عامل ايه يا غالي ...
صلاح : ازيك يا بني عامل ايه انا الحمد لله بخير انت عامل ايه واخبار مراتك ايه .
عبدالعزيز: احنا بخير و الحمد لله ... ومبسوطين جدا
صلاح: الحمد لله يا بني انك مبسوط انا بكون فرحان لما الاقي اولادي مبسوطين مع مراتتهم ومرتاحين .
عبدالعزيز: ايوة بجد يا بابا ... وانتم عاملين ايه وامي عاملة ايه واخبار اخواتي يارب تكونوا بخير انشاء الله
صلاح :كلهم بخير وبسلموا عليك وهما كلهم جمبي وامي عمالة تشد مني السماعة وعايزة تكلمك .
عبدالعزيز: هاتها يا بابا لانها وحشتني قوووووي
صلاح : اهي معاك
فوزيه وصوتها وهي بتعيط :ازيك يا ابني عامل ايه وحشتني قووووي .
عبدالعزيز لما سمع صوت امه حس برااااحة ما حسهاش من ساعة ما اتجوز وسافر .
عبدالعزيز: ازيك يا امي وحشتيني جدااااا
فوزيه: انت اكتر يا بني ... واخبار سارة ايه اوعى تزعل يا بني
عبدالعزيز: قولي لسارة ماتزعلنيش
فوزيه : ربنا يحفظك يارب .... هي مراتك فين ادهالي .
عبدالعزيز: ادى ياامي انت زهقتي مني ولا ايه
فوزيه: لا يابني انا عمري ما ازهق منك ابدا انا الود ودي اني اكلمك كل ساعة بس علشان مازعجكش وانت قاعد مع عروستك ..فين مراتك بقى الغالية دي .
عبدالعزيز: وانا يا امي مش غالي ولا راحت علينا خلاص
فوزيه: انت مالك النهاردة على كل كلمة تعلق عليها على فكرة غلاوت مراتك من غلاوتك بالظبط ....بس هي اكتر شوية ..ههههههه .
عبدالعزيز: ههههها ما شي يا ست الكل ... ما خلاص راحت علينا
سارا طول المكالمة وهي قاعدة جنب عبدالعزيز في السياره وسامعة الكلام كله مع اهله .... وكانت مستغربة امال مين اللي كان بيكلمه الصبح .... شكله كدة اول مرة يكلم فيها اهله من ساعة ما وصلنا .... وسرحت بافكارها وعبدالعزيز قطع سرحانها وهو بيقولها سارة كلمي ...
عبدالعزيز: سارة رحتي فين .... سرحانة في ايه
سارا: لا ولا حاجة
عبدالعزيز: طيب ماما عايزة تكلمك
خدت منه التليفون وكلمت حمتها .
سارا: ازيك يا ماما عاملة ايه وحشتيني
عبدالعزيز هو مستغرب ... وبيتكلم في سره (( ما كنتش اتوقع انها تنادي على امي بماما ) خليني اشوف بقى حتقول لماما ايه
فوزيه: ازيك يا سارة .... ازيك يا مرات ابني ... اخبارك ايه طمنيني عليكي انت مبسوطة .
سارا : الحمد لله بخير يا ماما ...
فوزيه: وعبد العزيز عامل معاكي ايه مقصر معاكي في حاجة .... لو مضايقك قوليلي بس وانا حوريكي حعمل فيه ايه .
سارا : لا يا ماما عبد العزيز مش مقصر معايا بالعكس دى نفسه يعملي أي حاجة عشان يبسطني ... وانا مبسوطة قووووي . ما تقلقيش يا ماما .
فوزيه: طيب الحمد لله يا بنتي وربنا يسعدكم ويهنيكم يارب ... ميرنا عايزة تكلمك يا سارة .
ميرنا: ازيك يا سارة عاملة ايه وحشتيني .
سارة : ازيك يا ميرنا انتي اللي وحشتيني قووووي وانا الحمد لله بخير وانت عاملة ايه
ميرنا : انا بخير المفروض اسألك على اخبارك انت
سارا: انا تمام والحمد لله ...
ميرنا : اخبار عبد العزيز معاكي ايه ؟؟؟
سارا: الحمدلله كويس
ميرنا : رهف بتسلم عليكي وبتقولكم ما تزودوهاش وماتطولوش عندكم .وبتقولكم ما تنسوش حفلتها خلاص قربت .
سارة : انت قررتوا حتعملوها امتى .
ميرنا : لسة المدرسة اخرتها شوية .....عشان البنات اللي مسافرين ترجع واللي مشغولة في التسجيل يكونوا خلصوا .
سارة : طيب طمنيني نتيجة التنسيق ظهرت ولا لسة .
ميرنا : لا لسة هي خلاص على اخرها ومرعوبة ... المهم انتي احكلي كل حاجة بالتفصيل ..
سارا: هههههههه يقطع شيطانك يا ميرنا عايزة تفلسي عبد العزيز ... لما ارجع انشاء الله ... عبد العزيز بيقولي يالا كفاية ....
ميرنا : هههههههه طبعا اكيد مشتقالك موووت ولا وعملتيها يا بنت عمي شوقي وسحرتي اخويا .
احمر وش سارة من الكلمة دي ... وهي نفسها تقولها لو تعرفي اللي جوايا يا ميرنا .. بس مش قادرة تتكلم عشان عبد العزيز جمبها وودانه معاها ... وعبد العزيز حس ان ميرنا قالتلها حاجة عشان كدة وش سارة احمر.
سارا: لمي نفسك يا ميرنا .. ويلا سلام بقى ..
ميرنا : طيب يا ستي هنيالك النهاردة انت افراج بس اول ما توصلي مصر مش حسيبك الا لما تحكيلي كل حاجة بالتفصيل .
سارا: انشاء الله مع السلامة
ميرنا : ههههه مع السلامة وخلي بالك من نفسك .
عبدالعزيز... ابتسم: طبعا الرغي عمره ما يخلص اكيد ما خلصتوش رغي
سارا: هههههه انا برغي رضه اصل ميرنا وحشتني قوووووي
عبدالعزيز: اوكي يالا ياسارة احنا وصلنا
ونزلوا ودخلوا الهارودز...... بعد ما تسوقوا هناك ...وسارة اشترت هدايا لاخوانها وحريمهم ... واخوات عبد العزيز ... كانت الهدايا بسيطة وحلوة .. بس عبد العزيز لاحظ انها ما اشترتش حاجة لنفسها .
عبدالعزيز: سارة ما اشترتيش ليه حاجة لنفسك
سارا : مش لقيا حاجة مناسبة
عبدالعزيز وهو بيفرجها على بدلة حلوة قووووي : ايه رايك في دي حتتطلع عليكي جنان ؟
سارا: بس غالي قوووي يا عبد العزيز
عبدالعزيز وهو رافع حاجب : خير ربنا كتير والحمد لله .. يالا روحي قسية .
عبد العزيز ادى لسارة البدلة عشان تقسها ... واستغربت سارة انه عرف مقاسها من غير ما يسألها ... وقاست سارة البدلة اللي طلعت تجننن فعلا عليها وكأنها متفصلة عشانها ... بعد ما خلصوا شرى حاجات... ..راحوا يتغدوا في المطعم اللي موجود في هارودز ....بعدين طلعوا يتمشوا في شارع اكسفورد ..ودخلوا سليفريج مول .. واشتروا حاجات وهدايا من هناك لمعارفهم...وبعد كدا رجعوا للفندق بعد ما تعشوا حاجات حفيفة ...وهم محملين بالاكياس ...مع انهم ارسلوا الاكياس الي اشتروها من هارودز مع سواق الفندق.... سارا كان نفسها تكلم امها بس مش عارفة تقول لعبد العزيز ....
عبدالعزيز وهو بيشوف الاكياس: عايزين نشتري شنططين سفر عشان الحاجات دي كلها
سارا: عبدالعزيز.....
عبدالعزيز لف لها : نعم
سارا: اممم .. ممكن اكلم اهلي بقالي يومين ما كلمتهمش .
عبدالعزيز: طبعا ممكن .. وفي أي وقت عايزة تكلميهم خدي موبيلي واتصلي بيهم من غير ما تستأذني .
سارا والفرحة على وشها : شكرا...
عبد العزيز اداها الموبيل وراح للاوضة ... وسارة اتصلت باهلها بس كانت خايفة ان ما فيش حد يرد عليها ... بس الحمد لله ردوا .
تامر : ازيك يا سارة عاملة ايه
سارا:الحمد لله انت عامل ايه يا تامر
تامر : معقول ... الانسة سارة قصدي مدام سارة تنازلت وبتكلمنا .
سارا: هههههههه...حرام عليك يا تامر .. لو كنت عاملة موبيلي تجوال كنت اتصلت بيكم كل دقيقة .
تامر : الحمد لله انك ما عملتهوش تجوال احنا ناقصين تكلمينا كل دقيقة انا ما صدقت انك سيبتي البيت من اولما جيتي على الدنيا وانت سارقة حنان امي وابويا مني هههههههه ....
سارا: انا برضه اللي وخده حنانهم ولا انت يا دلوع العيلة طبعا ما انت ا خر العنقود .امال ماما وبابا فين وحشوني ...
تامر : انتي بتتصلي دلوقتي والكل نايم
سارا: ليه نايمن الساعة لسة 11 عندكم
تامر : 11 ايه الساعة 12ونص يا فالحة ... لحظة اشوفلك ماما اعتقد اني سامعت صوتها .
وخرج تامر من اوضته الا ولقى امه رايحة اوضتها ومعاها كوباية ماية
تامر :يالغالية في بنت عايزاكي على التليفون .
كريمة : وهي فاتحة عنيها قوووي وباستغراب : بنت ايه يا ولا ... انت مسطول ولا ايه ولا كنت بتحلم .
تامر : هههههه انتي تعالي بس كلميها وحتعرفي انك بتحبيها قوووي .
كريمة : ماشي هات التليفون .... الو .
سارة : ازيك يا ماما عاملة ايه وحشتيني .
كريمة : ازيك يا حبيبتي والله انت اكتر عاملة ايه يا ضنايا .. ما تصلتيش من زمان ليه قلقتينا عليكي
سارة : معلش يا ماما لما بلاقي فرصة اتصل بتصل عالطول .بس انتوا وحشتوني قوووي وبابا عامل ايه ونفسي ارجع بقى يا ماما .
كريمة : والله انت اكنر يا بنتي ...بس اوعي تقولي كدة يا بنتي انت دلوقتي في عصمة راجل .. عشان جوزك ما يحسش انك مش عايزاه .. اسمعي كلام جوزك ... وطاعة جوزك واجبه يا بنتي ربنا امرنا بكدة ..ومهما قالك او عملك لازم تطيعه ماشي يا بنتي فاهماني .
سارا: ايوة يا ماما فاهمة ... بس طمنيني على بابا عامل ايه واخواتي .
كريمة : كلهم بخير والحمد لله ... اقولك خبر حلو مها مرات اخوكي حامل عقبالك يا بنتي .
سارا: بجد يا ماما الف الف مبروك باركلها وربنا يقومها بالسلامة انشاء الله .
كريمة : حاضر يا بنتي حوصلها سلامك .
سارة : كان نفسي يا ماما اكلم اخواتي بس مكسوفة اطلب من عبد العزيز .
كريمة : مالهوش داعي يا بنتي انا حطمنهم عليكي وبلاش تتقلي على جوزك في المصاريف .
عبد العزيز وهو طالع من الاوضة : سارة عندك اسبيرين عشان عندي صداع حيجنني .
سارة : ايوة عندك في الشنطة اللي على المرايا .
كريمة : سلمي عليه وماتضايقهوش ماشي يا بنتي .
سارة : بتكلم عبد العزيز وبتقوله : ماما بتسلم عل..........
ماقدرتش تكمل جملتها بعد ما شافت اللي ماسكة عبد العزيز من شنطتها ... ورفع راسه وبصلها ... وهنا فهم كل تصرفاتها وسبب وجع بطنها اللي تحس فيها انبارح ... طيب ليه ما قلتليش .. ما فيهاش حاجة ... دي حاجة طبيعية ومكسوفة تقولي ليه .... عبد العزيز حس ان سارة انحرجت قوووي .. لان وشها اتقلب تعابيره ... وكانت خلاص حتعيط ورجع الحاجة لشنطتها في مكانها زي ما كانت .
ولا كانه شاف حاجة : الله يسلمها ..... سلمي عليها قوووي ... انا حروح انام .
سارا فضلت متنحة وحاسة انها خلاص حتموت ... من الكسوف .. بس يمكن كدة احسن عشان يبطل زن ويعرف ايه سبب بعدي عنه .... افتكرت ان امها على التليفون وردت على امها .
سارا: اسفه ياماما معلش اتأخت عليكي
كريمة : هههههه لا عادي يا نبتي .. يالا بقى مش عايزة اطول عليكي . خلي بالك من نفسك.
: حاضر يا ماما سلام .
بعد ما قفلت التليفون مع امها ... فضلت مكانها وهي مالهاش وش تشوف عبد العزيز من الكسوف ... وسمعت صوته ..راحت للاوضة لقيته نايم ولا كانه شاف حاجة ... غيرت هدمها ونامت .
تاني يوم راحوا لmadme tussaud's (متحف الشمع) ... كان حلو قوووي وعجب سارة .. طول الوقت وهي بتتلكم مع عبد العزيز وبتحس براحة وهي بتلكمه ... تصرفات عبد العزيز اتغيرت قوووي معاها لما عرف ليه هي بتبعد عنه وكانت بتعيط اول ما يحاول يقرب منها .. معاملته احسن من الايام اللي فاتت كان بيتكلم معاها ويعلق .
في صوت جيه من وراى سارا: سارا
لفتت سارا على الصوت عشان تعرف مين اللي كان بينادي عليها لقيت صحبتها مريم ...
سارا: مريييييم...
قالت لعبدالعزيز: حروح اسلم على صحبتي ....
عبد العزيز: طيب روحي وما تتأخريش وانا حروح هناك
سارا: اوكي....
وراحت لمريم وسلمت عليها ...مريم صحبة سارا من ثانوي ...وافترقوا بعد ما راحوا الجامعه ...لان سارا دخلت جامعه اكتوبر ومريم دخلت طب اسنان القاهرة ... قعدوا يتكلموا ويعرفوا اخبار بعض ...
مريم: مين اللي معاكي دى ياسارة اعتقد انه مش اخوكي ؟
سارا حبت تهزر مع مريم :دى اخو ميرنا صحبتي ..
مريم وهي مستغربة ورافعة حواجبها : وانتي بتعملي ايه معاه هنا ..
سارا: يعني ايه رايك فيه ..
مريم ولسة مستغربة وفتحت عنيها على الاخر : اوعي تكوني عملتيها يا خااااااينة وتجوزتي ....
سارا: ههههههه ايوة ...
مريم: طب ليه ما قلتليش ...
سارا: الموضوع جيه بسرعة ...دى احنا بقالنا اسبوع بس متجوزين ....
مريم وهي تغمز: يعنى انتى في شهر العسل..؟؟
سارا: هههههههه...تقدري تقولي كدة
مريم : مبروووك الف مبروك ..والله انك فرحتيني .. يالا عشان ماخركيش ... شوفي عامل ازاي مش عارف يقف على بعضه وكل دقيقة ببص عليكي .
سارا: لا عادي ... خليكي معايا انا لسة ما شبعتش منك .. انا ما صدقت اشوفك بعد المدة دي كلها .
مريم: انتي حتقعدي لغاية امتى في لندن
سارا: مش عارفة والله
مريم: سارة دى رقم شقتنا اللي هنا ودى رقم موبيلي ... لما تلاقي نفسك فاضية وحبيب القلب سابك اتصلي بيا ونتفسح مع بعض ...
سارا: اوكي خلاص يالا فرصه سعيده..
مريم: باي
ورجعت سارا لعبدالعزيز.....الي كان متضايق شوية..
عبدالعزيز: مين دي
سارا: دي مريم صحبتي انا وميرنا من ايام ثانوي ...
عبدالعزيز: وانتوا ازاي تصاحبوا الاشكال دي ؟؟؟؟
سارا:ومالها الاشكال دي ؟؟
عبدالعزيز: انت مش شايفاها ولا ايه من غير حجاب ومكياجها صارخ قوووي
سارا: هي كدة واهلها فري خالص
عبدالعزيز:ايه فري دي ... دي غفلة وما يعرفوش ربنا مش حرية
سارا: هي حرة انت زعلان ليه
عبدالعزيز ماعلقش على كلامها ... وكملوا مشي ... بعد ما خلصوا من المتحف راحوا عالطول على الهايد بارك ...
سارا: تعالي نشوف ساعة بيج بن
عبدالعزيز الجو حلو قوووي النهاردة وما كملش كلمته الا وبنزل المطر اللي قومهم من مكانهم ..... والحمد لله ان عبد العزيز اللي كان عارف تقلبات الجو في لندن كان عامل حسابة وجايب شمسية .. بس سارة ماكنش عندها واضطر انه يديها الشمسية بتاعته وهو واقف معاها تحت الشمسية... طبعا كانت مغطيه جزء منه ...لانه كان حريص ان سارة تتغطى كلها ورجعوا للفندق بسبب المطر ...
سارا: ياااه ياعبد العزيز انت اتبليت خالص
عبدالعزيز وهو كان بيبص على هدومه اللي كانت مبلولة على الاخر : لا عادي
سارا: طيب غير هدومك بسرعة قبل ماتاخد برد
عبدالعزيز: خايفه عليا..
سارا اتكسفت ووشها احمر : لاء بس عشان لو تعبت انا اللي حلوص بيك .ومش حعرف اتصرف في الغربة .
عبد العزيز :قال وانا اللي كنت فاكرك انك خايفة عليا .
سارا: طيب يالا غير هدومك
عبدالعزيز: ههههههههه خلاص حغير اه افرحي يالا خلاص مش حتعب واخليكي تلوصي معايا.......

الفصل الثالث
الجزء الثاني


وفي بيت صلاح كان عمر قاعد في اوضته وبيفتكر المرحومة مراته ...كانت واقفه تبتسم ليه ....وقف مدة يتأملها ومش قادر يشيل عينه من عنيها .... يا الله بجد اشتقتلها قوووي ... ونفسي اضمها واقربها مني ... مد ايده ليها .. وكأنه مسك ازازة ماية ساقعة قووووي ... وضغط جامد ... لغاية لما حست بالم فيها ...ويقولها ليه كدة تسيبني كدة ... انا ما اسواش حاجة من غيرك .... وفضل يتأمل ملامح وشها اللي كانت محفورة في عقله ..... ...ومستحيل تتمسح حتى لو مرت مية سنة ... افتكرك اخر لحظة معها ... اخر مرة شافها ... اخر مرة كلمها ... اخر مرة ضمها ليه .... اخر كلمة قالتهاله ... يااااااااه انا فعلا ما اسواش حاجة من غيرك يا ام مي .......مهما عملوا اللي حواليا مستحيل انهم يسدوا الفراغ اللي انت سيبتيه ....بحبك والله بحبك ... ومستحيل احب حد غيرك ... رفع البرواز اللي فيه صورتها ... وقربه منه ... وضمه لحضنه كأنه طفل يضم العروسة بتاعته ...حس بدموع تتجمع في عنيه ... الى امتى حعيش في الحزن بحاول اقول للناس اني خلاص نسيت وقادر اتكيف مع الوضع .... بس انسى ازاي في حد ينسى اسمه في حد يتخلى عن روحه وحبه الوحيد ...
مي: بابا..ممكن ادخل
على طول رجع عمر البرواز لمكانه ..ومسح الدمعه اللي لسة نازلة على خدة .
: ايوة طبعا يا حبيبتي الباب مفتوح .
دخلت مي بوداعتها وجمالها الي خدته من امها...كانت نسخه مصغره منها .. نفس العيون الواسعه المكحله ..والمراخير ة الصغير... الحاجة الوحيدة اللي اخدته من ابوها هو نوع الشعر ولونه ... جات مي لابوها وقعدت في حضنه .
عمر وهو يبتسم للي بقى له من حبيبته: القمر عايز ايه
مي وهي بتحضن ابوها: لا بس وحشتني يا بابا انا ما شوفتكش النهاردة خالص
عمر:يا عيون بابا.
مي: بابا ..انت بتحبنى..؟؟؟
عمر استغرب من بنته الي اول مره تساله السؤال ده : اكيد طبعا بحبك ... ليه بتسألي .
مي: يعني مش حتسبني
عمر: حروح فين يعني هو انا اقدر اسيبك يا قمر
مي ابتسمت ابتسامه كبييره.: ورفعه راسها وباست ابوها على خده ..حس عمر باحساس غريب ..بنته فيها حاجة وعمرها ما تصرفت التصرف دى قبل كدة ... قامت مي من حضن ابوها خرجت من الاوضة ... وعمر لسة سرحان .. من ساعة ماحس بمي .
عمر: مي
مي لفت لابوها: نعم..
عمر : تعالي ياحبيبتى رايحة فين
مي: لا بس خلاص شفتك يابابا..
مستحيل يوم يمر على مي من غير ماتشوف ابوها ... كانت خايفة انه يختفي من حياتها زي امها ما اختفت ... والكل يعرف الموضوع دى والاحساس اللي بتمر بيه مي .. ولو مر يوم من غير ماتشوف ابوها تقلب الدنيا وماتقعدهاش .
عمر: طيب تعالي اقعدي مع بابا .
رجعت وقعدت جمبه على السرير .
عمر: خرجتي في مكان النهاردة .
مي: ايوة رحت من تيتا عند عمتي نورا .
عمر: وانبسطتى هناك..؟؟
مي: ايوة لعبنا كثير.... بابا نفسي يبقى عندي اخوات زي سمية بنت عمتو نورا .
عمر: ليه وبعدين حيخدوا لعب مي
مي: عادي..
عمر عايز يغير الموضوع : مي مين في البيت .
مي: تيتا وعمتي ميرنا وعمتو رهف .
عمر وهو قايم وماسك ايد بنته: يالا تعالي نروحلهم
خرج عمر وبنته من الاوضة ... وهو حاسس ان بنته مش طبيعية النهاردة شكلها فيها حاجة .... لما نزلوا لقوا الدنيا مقلوبة ... الارض كلها مفروشة كتالوجات وهيصة ..
عمر: ايه الهيصة اللي انتوا فيها دي
ميرنا : لاء اصل الاخت رهف بتختار موديل للفستان بتاعها عشان حفلتها .
عمر: حفله ايه
رهف: حفله تخرجي..
عمر: اوعي تقولي عشان خلصتي الثانوية العامة .
وقعد على الكنبة جمب امه بعد مباس راسها .
وقعد عمر يناكف في اخته رهف بخصوص الحفلة عشان تخرج الثانوية العامة .... وقعدوا يتريقوا على بعض فترة .وبعد مناقرة طويلة مع عمر واخته رهف .
عمر: والله دلع بنات انت موافقة ياماما على اللي بتعمله بنتك
فوزيه: وموافقش ليه ما دام ابوها موافق
عمر: والله ما فيش حد مدلعلهم الا ابويا . ربنا يكون في عون اللي حيخدكم
ميرنا : اصلا يا بختهم بينا .. هما يلاقوا زينا فين ولا نسيت احنا بنات مين .
رهف: ايوة احنا بنات صلاح وفوزية مش اي بنات
فوزيه: والله انتوا لسانكم دى عايز يتقطع
عمر: ماشي بس مي حتروح الحفلة
رهف: انت بتتكلم بجد ... ما فيش اطفال في الحفلة
عمر: مش بكفيك ... مي عايزة تروح الحفلة
مي الي كانت ساكته زي عادتها : لا انا مش عايزة اروح
ميرنا : هههههه خايفة من رهف .
عمر: دى اللي فاضل كمان بنتي تخاف من الاشكال دي
رهف: ليه ماله شكلي انشاء الله
عمر: عاملة زي القرد
رهف وهي عاملة نفسها زعلانة : طيييييييب ما ابقاش رهف لو مدخلتش بنتك المدرسة ولا اخليها تدخل الحفلة اصلا .
عمر: لو بنتي عايزة تدخل حتدخل غصب عن الكل .
فوزيه: بس بقى انت وهي صدعتوني ... بس يا رهف بطلي مناكفة مع اخوكي الكبير .
رهف: قال كبير قال انت مش شايفة بيقولي ايه يا ماما
ميرنا : تصدقوا ان شكلكم حلو قووووي وانتوا بتتناقروا كدة .
رهف: بقولكم ايه انا حسبلكم المكان كله وحروح قاعد في اوضتي اكرملي
عمر: يالا مع السلامة ههههههههههه والله اعقل واحدة فيكم القمر اللي قاعد جمبي دي ... تعالي يا حبيبة بابا ...وشاور على حضنه ... راحت مي عالطول وقاعدت في حضن ابوها .
رهف: وهي طالعة اوضتها .... وقال بابا مدلعني .. امال انت بتعمل ايه مع بنتك
عمر: والله في ناس تستاهل الدلع وناس ما تستهالهاش اصلا
ميرنا : كويس انك عرفت ان بنتك ما تستهلش الدلع .
عمر: بقولك ايه انت كمان اسكتي ولمي نفسك انا اللي غلطان ان بتلكم مع عيال زيكم ... كفاية اني اكلم مع احلى حوريتين في البيت دى ..
رهف: سمعت الكلمة دي وهي طالعة كدة على السلم وردت على عمر طبعا انا الحوريةالاولى مش كدة .
عمر : بس يا حشرية اطلعي اوضتك يالا ... مش انت غضبانة .ايه الناس اللي معندهاش دم دي .
عمر وهو بيبص لامه اخبار عبد العزيز ايه يا ماما كلمك ولا لاء ؟؟
فوزيه: ايوةكلمني انبارح ... ربنا يوفقه مع مراته ... انا فرحناله قووووي .
ميرنا : قولي ربنا يعين سارة على غلاسة ابنك .
فوزيه : ما تقوليش على اخوكي كدة .. اخوكي مش غلس .. دى زين الرجالة
رهف غيرت رايها ونزلت من اوضيتها .... لقيت المناكفة مع اخواتها احسن من قاعدتها في الاوضة لوحدها ..... وهي نازلة سمعت الكلام اللي امها بتقوله على عبد العزيز
رهف: هههههههههههههههههها اعترفي بغلاسة ابنك يا ماما
عمر: ليه هو في حاجة حصلت ولا ايه
ميرنا بتبص لرهف وبتقولها اوعي تقولي ...عمر عمال يبص لهرف وميرنا باستغراب
رهف: لا ولا حاجة حيكون في ايه يعني
عمر : بس يا جبانة خايفة من ميرنا .
رهف: انا مش جبانة بس مش عايزة اقول وخلاص
عمر: انتوا حرين هوانا حتحايل عليكم ولا ايه ...
رهف: هههههه خلاص حنقول لمي وهي مش حتقول لبابا ... صح يا مي
عمر: بنتي اصلاما بتخبيش حاجة عليا ... وهي مش عايزة تسمع منكم حاجة
ميرنا : تعالي يا رهف نقعد فوق في الاوضة احسن انا وانتي ... احسنمنالقعدة معاهم ..
رهف : يالا يا اختي يا حبيبتي ههههه.
عمر: مع الف سلامة والقلب داعلكم
فوزيه: انت عامل ايه يا ابني شكلك مش عجبني النهاردة في حاجة .
عمر: لا يا ست الكل ما فيش حاجة ... بس شكلي ما نمتش انبارح كويس ونمت متأخر وصاحي بدري ...
فوزيه :طيب ما تقوم تنام وتريح يا حبيبي ....
عمر : اشوية كدة وحطلع انام ... روحي نامي انتي يا ماما .
فوزية : ماشي خلاص انا حنام لو ابوك جيه وانت قاعد قولي اني طلعت انام .
عمر : ماشي يا ماما .... تصبحي على خير .
وقامت فوزيه....
عمر بص لبينته لقاها نايمة في حضنه زي الملاك ... سرح فيها وفي ملامحها الجميلة دي... بنته كانت اكبر من عمرها ما بتحبش تلعب كتير زي الاطفال اللي في سنها ..ولا تتكلم مع حد ... كانت لغز للكل.. وما حدش يعرف اللي جواها سواء كانت زعلانة او فرحانة... ومحدش يقدر يقرب منها ...والوحيد الي فاتحه له المجال ابوها ... وبعده عمها عبد العزيز ... يعنى بتميل للجالة اكتر من عماتها.. والحاجة دي كانت بضايق عمر قوووي ...عايزها تتقرب من عمتها اكتر... مع انهم مش مقصرين معاها .. بس مش عارفين يكسبوها ..يمكن لانهم سنهم صغير مش عارفين يتعاملوا معاها ...واخته نورا مشغولة مع جوزها وعيالها .... قام عمر وشال بنته ..
وعمر قايم وهو شايل بنته ... نزلت ميرنا ....
ميرنا : رايح فين يا عمر ...
عمر : انت مش شايفة مي نايمة ... طالع انيمها في سريرها
ميرنا : صحيح يا عمر ... انت سجلت مي في المدرسةولا لسة .
عمر : اه عمتها نورا سجلتها خلاص .
ميرنا : طيب كويس ... انت حتنام ولا نازل تاني .
عمر : لاء خلاص حروح انام لاني تعبان طول النهار في الشغل
وهو طالع قابل رهف ....
رهف : على فين .
عمر : حنام ... في حاجة يعني .
رهف : لا عادي ... تصبح على خير .
عمر : وانتي من اهله .
وطلع عمر لفوق وحط بنته في اوضته ..مع انها دايم تنام في اوضة تانية خاصة بيها ...بس الليله دي ما خلهاش تنام لوحدها وكان عايزهاتنام في حضنه . ....قعد عمر على مكتبه وهو بيفكر في حياته ......الي تغيرت 180 درجه.... مي وحتدخل المدرسه بعد الاجازه ... ودلوقتي كدة هي عايزة عناية اكتر من الاول...مين اللي حيدرسها ويعتني بامورها المدرسية ,,,... بتروح تشوف غيرها من البنات ...واكيد حتكتر اسألتها على امها ... حيقولها ايه لما تسأله... هي سالته مره ..وقال لها انها في الجنه ..ووقتها قعد ساعة عشان يفهمها ..ومن بعدها ما سألتهوش تاني ولا فتحت الموضوع معاه ..... مع انه حاسس ببنته ...لما ببص لعنيها بيلاقيها مليانة اسألة كتير..... واللي متعبه انها ما بتتلكمش ولا حتى بتنطق بكلمة واحدة ....... والموضوع دى مقطع قلبه ... ومش عارف يعمل ايه مع بنته ..
يا ترى الايام اللي جاية مخبية ايه لعمر ....

الفصل الثالث
الجزء الثالث

وفي لندن ....
عبدالعزيز: سارا انا خارج دلوقتي عندي شغل حخلصة وارجع .
سارا: طيب..حتيجي امتى ؟
عبدالعزيز:مش حتأخر ... انشاء الله حرجع على الساعة 5 العصر .
سارا: حتسبني هنا لوحدي ؟؟
عبدالعزيز:لو زهقتي روحي الجيم اللي تحت ... واطلبيلك غدا عشان انا حتغدى برة .
سارا: بس انا بخاف يا عبد العزيز ...
عبدالعزيز بسخريه: ماتخافيش ما فيش حد حياكلك ... اعتقد اني مش متجوز عيلة .
سارا: خلاص روح براحتك .....
عبدالعزيز: لو عزتي حاجة اتصلي بيا على الموبيل .
سارا: اوكي..
وخرج عبد العزيز من الفندق ... وسارة كانت مضايقة قوووي من تصرفاته .... يعني يسبني كدة واحنا لسة في شهر العسل ....ايوة انا ما انكرش ان الايام اللي فاتت كان بيفسحني كل يوم في مكان شكل ...ومش مقصر معايا ... بس ما يسبنيش كدة لوحدي ...وشغل ايه دى اللي حيتأخر فيه لغاية الساعة 5 .... وكمان حيتغدى برة .... افتكرت صحبتها مريم ... قالت حتصل بيها واتكلم معاها شوية ... واتصلت من تليفون الفندق على موبيل صحبتها ..
سارا: الوووو
مريم: اهلا ... مين معايا
سارا: انا سارة انت ماعرفتنيش يا وحشة ؟؟
مريم: اهلا اهلا بالعروسة اخبارك ايه ؟؟
سارا: تمام بخير وانتى؟
مريم: انا بخير والحمد لله
سارا: بقولك ايه يا مريم ايه رايك تجيلي الفندق نقعد مع بعض النهاردة
مريم: لا انا اتكسف من جوزك ..
سارا: لاء ما هو مش موجود انا لوحدي ..
مريم استغربت من جوز صحبتها ازاي سايبها في شهر العسل ...سكتت وما حبتش تعلق على الموضوع وتحرج سارة ....
مريم: اوكي انتى فين وانا اجيلك
سارا: انا في فندق الفور سيزن..
مريم: خلاص كمان ساعة وحكون عندك ....
سارا: خلاص انا في جناح في الطابق الاخير ..
مريم: اوكي سي يو..
وقفلت التلفزيون مع صحبتها .....وهي مبسوطة لانها لقت حد يتكلم معاها بدل ما تكلم الحيطة ....راحت تلبس وتجهز عشان تستعد وتستقبل صحبتها ...لبست بطلون اسود وتونك لبني طويل ...ولبست حجاب اسود ...والحجاب مش مخبي جمالها ... ونزلت الريسبشن عشان تستنى مريم صحبتها .
مريم وصلت بعد عشر دقايق من نزول سارة للريسبشن ...ومريم كانت لبسة بنطلون جينز ضيق جدا .... واستغربت سارة من لبسها .. وكمان كانت لبسة بلوزة كحلي ... ومنزلة شعرها الطويل على كتفها ...
مريم: هااااااااااااااااي سوسو
راحت لها سارا وسلمت عليها ....
سارا: اهلا مريم
مريم: يارب ما اكونش اتأخرت عليكي ..؟؟؟
سارا: لاعادي..المهم ما اكونش انا معطالكي
مريم: بالعكس دى انا اتبسطت قوووي لما اتصلتي بيا .... على الاقل ارتاح من اخواتي شوية .
سارا: طيب تعالي نقعد هنا ونطلب حاجة نشربها .
مريم: ايه نقعد هنا تعالي نخرج برة الفندق ونروح مطعم
سارا بارتباك : لاء نطلع فين مما ينفعش ؟
مريم: ليه مش عايزة تتغدي معايا ؟
سارا:لا يا هبلة ... انا عزامكي على الغدا في مطعم الفندق .
مريم: ما ينفعش انتي عروسة ... وثاني حاجة اي مطعم فندق دى .. انا بعرف مطعم عراقي اكله يجنن .
سارا: يااااه من زمان مأكلتش من مطعم عربي كل اللي المطاعم اللي بناكل منها مش عربية.
مريم: اوكي خلاص يالا نروح المطعم اللي انا اعرفه .
سارا: لاوالله مااقدرش ... لاني ما استاذنتش من عبد العزيز
مريم: لو استأذنتي منه مش حيوافق
سارا: وانا اعتقد كدة ... يبقى خلاص خلينا هنا وما نروحش في حتة ..
مريم: هو حيجي امتى ؟
سارا: يعنى على الساعة 5 العصر...
مريم: خلاص يادوب نروح ونرجع قبل ما يجي
سارا: بس ما ينفعش اخرج من غير ما اقوله
مريم: رني عليه
سارا: لالالالا اخاف اتصل بيه .. انا عارفة هو مش حيوافق ... خلاص خلينا هنا بقى وخلاص .
مريم: لا سارا يالا اتصلي بيه ... في تليون هناك اهو ...
سارا: ربنا يستر ... لحظة حروح اتصل بيه .
وراحت سارة للتليفون وهي مرعوبة من ردت فعل عبد العزيز ... بعد ما دخلت الفولس راتصل بعدالعزيز مردش عليها ... حاولى مرة ثانية وثالثة ولا في فايدة ...
عبدالعزيز كان قاعد مع رجال اعمال عشان كان بيخلص شغل معاهم ومخلي الموبيل بتاعة على السايلنت .
جالس مع رجال عشان يسوي الشغل الي معاه وحاط الجوال على السايلنت ...
سارا: مايرد..
سارة رحعت لمريم وهي مرعوبة ..
سارة : ما بردش عليا ... شكله مش فاضي ... انا خايفة يا مريم
: يا مجنونه خايفة من ايه ... انتي بلغي الريسبشن انك خارجة ولو رجع جوزك يبلغوه ... اصلا حتى لو اترفز عليكي مش حيزعقلك انتوا في شهر العسل ..
سارا: طيب خلاص بقى خلينا نتغدى هنا وخلاص .
مريم: يوووه بجد انت جبانة ومملة ... يالا حفسحك في مكان اعتقد ان جوزك ما فسحكيش فيه ...
سارة فضلت تفكر في الكلام اللي قالته مريم ... طيب هو دلوقتي عبد العزيز سايبني لوحدي ويمكن يتأخر ليه انا ححبس نفسي .... وفي واحدة حتفسحني ليه ما اخرجش واتبسط .
سارا: خلاص يالا نروح
مريم: ايوة كدة خليكي عندك شخصية
كانت الساعه حوالي 11 الظهر...خرجوا وراحوا يتمشوا مروا جنب ستاربكس ..وكانت هناك في شلة شباب عرب واقفين ..الشباب اول ما شافوا مريم سلموا عليها وردت السلام عليهم كأنهم اهلها .
سارا: مريم مين دول ؟؟؟؟
مريم: ده محمد وخالد اخوات مها صحبتي
سارا باستغراب: وانتي ليه بتسلمي عليهم
مريم: وفيها ايه زي اخواتي بالظبط كلنا هنا اصحاب .
سارا بجد اتصدمت ..غريبه . ....لما جت الساعة 12 ونص راحوا يتغدوا لان مريم ما فطرتش ... وسارة كانت وكله على الفطار نص قطعة كروسون وفنجان قهوة .
وكانوا ميتين من الجوع ... اتغدوا في المطعم العراقي(الله انصر اخواننا العراقيين على العدوان الامريكي)....
بعد ماخلصوا غدا ... راحوا يتسوقوا ودخلوا وايت ليز مول... طول الوقت كانت شلة الشباب وراهم ما فرقتهمش لحظة ...سارة ما كنش عجبها الوضع ابدا .... مريم ما خلتش شاب الا ومشي ورانا طيب هي ممكن يمشوا وراها عشان لبسها .. طيب انا يمشوا ورايا ليه وانا محجبة وملتزمة ...واي شاب عربي يشوفهم لازم يعلق ... اللي قول ايه الجمال دى ... واللي يقول اموت في العربي . واللي يقول ايه القمر دى ..كان الوضع منرفز سارة جداااا لانها مش بتاعت شباب والحاجات دي ....وكانت مضايقة جدا وفي نفس الوقت مكسوفة من صحبتها انها تسبها وترجع الفندق ... ومريم ما كانش هامها الوضع بالعكس دي كانت مبسوطة على الاخر ...
مريم: بقولك ايه ياسارة ايه رايك ندخل السينما اللي هنا .
سارا: لا اخاف اني اتأخر .. انا بقول كفاية كدة ونرجع الفندق
مريم: ليه لسة الساعة 2 الظهر قدامك لسة 3 ساعات كمان .
سارا: طيب لو في فيلم حيعرض دلوقتي ماش لو ما فيش خلاص .
مريم: اوكي يالا بينا ..
سارا ..كان نفسها تدخل الفيلم على الاقل تخلص من شلة الشباب اللي مشينين وراهم ... المهم راحوا فوق للسينما ولقوا كذا فيلم بمعروض ... لقوا فيلم Freaky Friday..مع ان سارا شايفته قبل كدة بس قالت معلش..مريم قالت انا عايزة اشوفه لان اصحابي كلهم كانوا بيمدحوا فيه ....... ودخلوا الفيلم.... واتبسطت سارا لان القاعه كانت تقريبا فاضيه ... لانه فيلم قديم شوية ...قعدوا في الصف القبل الاخير ....طبعا خدوا الفيشار والبيبسي......شوية وحيبدأ الفيلم الا ولقوا شلة الشباب اللي كانوا ماشيين وراهم دخلوا السينما ... وكانوا تقريبا 8 اولاد قعدوا وراهم ... يعني القاعة ما فيهاش الا سارة ومريم وشلة الشباب بس ... سارا ما حبتش تقوم عشان ما تمرش قدامهم ...وفضلت قاعدة وهي مضايقة من الوضع ... بجد كانت خايفة جدااا وحست بالذنب وتأنيب الضمير ... لو عرف عبد العزيز حيعمل معاها ايه .... وافتكرت لما اترفز عليها لما كانت في الباخرة على السطح لوحدها وكان الشباب بيبوصوا عليها .... امال حيعمل ايه لما يعرف اني كنت في السينما وواضح ان الشباب دول دخلوا عشانهم مش عشان الفيلم ......حست انها واطيه ..مع انها مالهاش ذنب... بس المظاهر خداعه وهي كانت مع وحده مطلعه مفاتنها كلها.....
سارا وهي بتوشش مريم : تعالي نخرج من السينما شكلنا كدة غلط ومش لطيف خالص
مريم ولا هامها : واحنا مالنا بيهم .. لا انا مش عايزة اخرج انا عايزة اكمل الفيلم ..
سارا: شوفيه بعدين ... بالا يا مريم ما ينفعش كدة .
مريم: عايزة تخرجي انت براحتك انا مش عايزة .
اتصدمت سارة من رد مريم .... اصلا هي مش خايفة على سمعتها ... سارة قعدت تفكر ... حتلطع ازاي وحست انها خلاص حتعيط يالله ازاي انا كنت مخدوعة في الانسانة دي ... يارب صبرني واسترها من عندك يارب ...اصلا انا استاهل ليه اخرج معاها من الاساس وكمان مش واخدة الاذن من جوزي ...ياربي اعمل ايه ..
قعدت تشوف الفيلم وهي مش قادرة تركز من صوت الشباب اللي مخلوش كلام الا وقالوا عليهم ... سمعت شاب وراها بيقول لصاحبه .. تخيل اللي قاعدة قدامي دي المحجبة لو لبست بنطلون زي صحبتها حيطلع عليها فظيع ..
سارة لما سمعت الكلام دى اتنرفزت وكان الدمعة على عنيها خلاص .... لانهم كانوا يقصدوها هي لان هي اللي وراهم .
وقاموا الشله الباقيه يضحكوا ....
مريم: سارة طنشي ولا يهمك بكلامهم
سارا: مريم كفاية كدة يالا نطلع
مريم: انا مش عايزة يالا اسكتي وما تبوظيش الفيلم عليا ...
قام واحد من الي ورا على اساس انه حيخرج وهو بيمر من ورا سارة الا وجسمه لمس راس سارة ...سارة اتصدمت ..ولفت على ورى بسرعه ... الا والشلة كلها قامت تضحك تاني ... وقامت عالطول سارة .وقالتلهم قلة ادب ....وخرجت من السينما ... اللي كان منرفزها انهم كانوا مطنشين مريم مع انها مش لابسة الحجاب وكل حاجة ظاهرة فيها ...وحاطة ميك اب صارخ ... بس ما يتلاموش لان جمال وبراءة سارة لا يقارن بجمال مريم المصطنع ..
مريم اللي جريت ورا سارة عشان تحصلها
مريم: سارة ... استني انت رايحة فين
سارا: انتي ايه رايك عجبك الوضع اللي كان جوة .
مريم: ياشيخه عادي وفيها ايه يعني
سارا: بجد انا اتصمدت فيكي يا مريم انا مكنتش اتوقعك بالاخلاق دي ابدا
مريم :ليه هو انا عملت ايه ... ما تبقيش معقدة وخليكي فري .
سارا: دى مش تعقيد ...
مريم بسخريه: مش عارفة انك ملتزمة للدرجاتي
سارا: مش لازم اكون ملتزمة عشان ارضى على الوضع والبيئة اللي انت عايشة فيها دي .
مريم: يالا يا سارة وبلاش زعل . تعالي عشان نكمل الفيلم
سارا: لا انا مش حرجع وحروح النفدق
مريم: كفاية بقى ياسارة ويالا نكمل الفيلم
سارا: بس انا مش عايزة
مريم: خلاص انتي حرة هو انا حتحايل عليكي ...خدي تاكس وروحي الفندق انتي مش صغيرة انا جيتلك الفندق لوحدي .
سارا: بس..مريم انتي بتتكلمي بجد
مريم : ايوه والله بتكلم بجد
سارا: انت مش غلطانة انا اللي غلطانة اني طلعت معاكي اصلا .
مريم: بقولك انا مش عايزة وجع دماغ وتقلبهالي دراما ... عيزة تمشي مع السلامة
سارا:اوكي
سارة نزلت تحت .. قامت تتمشى في الشارع بدور على تاكسي عشان يرجعها الفندق... وبعد ما وقفت تاكسي اتفكرت ان شنطتها مش معاها ... ياربي انا شكلي نستها في السينما .. ما فيش حل الا اني ارجع تاني عشان اجيبها ... وبعدين افتكرت الشباب وخناقتها مع مريم ... فعشان كرامتها ما رضيتش ترجع تاخد الشنطة ... طب ايه الحل دلوقتي ... اعتقد ان الفندق بعيد .. اسأل مكانه فين واروح له مشي.
......
وفي مصر وتحديدا في شركة شوقي وصلاح .. كان شوقي في مكتبه بيفكر في بنته سارة اللي ما كلمهاش الا مرة واحدة ... وحشته قوووي ومشتقالها جداااا ... وهو سرحان .. كا في حد بيدق باب المكتب ففاق من السرحان اللي كان فيه .
شوقي : اتفضل .
تامر : السلام عليكم يا ابو محمد .
شوقي وهو شايفه من ساعتين : اهلا يا تامر بتعمل ايه هنا انت مش عندك جامعة دلوقتي .
تامر : لاء انا عندي محضرات بليل .
شوقي : اكيد عايز حاجة عشان كدة جيت .
تامر بهزار : طبعا جي اطمن على فلوسي اللي انتوا بتشغلوها هههههه
شوقي : والله انا نفس اعرف انت امتى حتكبر وتعقل وتبقى راجل متحمل المسئولية وتبقى زي اخوك محمد وعبد الله .نفسي اعرف ايه اللي بيعجبك السرمحة في الشوارع مع الصيع اللي زيك .نفسى تركز كدة في مذكرتك .
تامر : ايه يا بابا المحاضرة الطويلة العريضة دي .... ليه الكلام دى كله .. كل ده عشان جيت اسلم عليك ... وادرس ايه دلوقتي ما فيش امتحانات لسة .
شوقي : اللي يسمعك كدة يقول انك اصلا بتذاكر اوقات الامتحانات .. اللي في سنك اتخرجوا من زمان .
تامر : انشاء الله حذاكر وحتفرح بابنك قريب .
شوقي : حشوف .. ما مرتش على اخوك محمد قبل ما تجيلي .
تامر : لاء طبعا لازم اجيلك انت الاول بعدين اطمن على الرعية هههههه .
شوقي : الكلام دى تضحك بيه على امك مش عليا .
تامر : مالك يا بابا النهاردة انت مش طايقلي كلمة ليه .
شوقي : لا ما فيش حاجة بس مضايق شوية ..حال عمك صلاح مش عجباني الايام دي .
تامر : عمي صلاح ... خير ماله
شوقي : هالك نفسه في الشغل مش عايز يرح نفسه وصحته ومش عايز يسمع كلامي .
تامر : سيبه على راحته يا بابا هو عارف مصلحته .
صالح:على رايك يا ابني ... يالا بقى نروح عشان امك ما تتنرفزش علينا ههههههه.
تامر : انت خايف من ماما هههههههه.
شوقي بص لابنه بنظرة سكتته وما خلتهوش يتكلم كلمة واحدة .
وهما خارجين من المكتب لقوا عمر قدامهم كان شايل ورق لابوه لصلاح لانه كان عايزهم .
عمر وهو بيسلم على عمه شوقي : ازيك يا عمي ... شكلك خارج .
شوقي : ايوة يا بني حروح الساعة بقت 4ونص .
عمر: مع الف سلامة وسلم على ام محمد .
شوقي : بقولك ايه يا عمر خلي بالك من ابوك دى بيهلك نفسه قوووي في الشغل .
عمر:ما تخافش يا عمي انا واخد بالي منه بس هي الفترة دي بس لغاية لما يرجع عبد العزيز بالسلامة .
ابتسم شوقي : انشاء الله يرجعوا بالسلامة .
عمر: ههههههههه شكلك كدة وحشك قوووي يا عمي ... كل دى عشان نسيبك امال انا رحت فين .
شوقي وحط ايده على كتف عمر : والله لو عندي بنت تانية انا ما كنتش اترددت وجوزتهالك ... انت عارف يا عمر انتوا كلكم عيالي ... انت في معزة محمد وعبد الله وتامر .
عمر: متشكر قوووي يا عمي على الشعور الطيب دى بس انا كفاية عليا مي بالدنيا كلها .
شوقي وهو عاقد حاجبه : ومين مي دي كمان .
تامر : ههههههه ايه يا بابا دي بنته .
شوقي : اه انا بحسب تعرف وحدة اسمها مي هههههههه
عمر بابتسامة : لا ماتخافش يا عمي ما فيش حد يقدر يملى مكان ام مي الله يرحمها .
شوقي حب يغير الموضوع : معلش يا بني اصل انا جعان هههههه
تامر : وانت عارف يا عمر لو ابويا جاع محدش يقدر يقرب منه .
شوقي : ولا يا تامر لم لسانك .
عالطول سكت تامر وحس ان ابوه اتنرفز منه بجد .
شوقي : يالا يا عمر ما نعطلكش عن ابوك ... وزي ما وصتك يا بني خلي بالكم من ابوكم ولو عايز حد يسد مكان عبد العزيز لغاية لماترجع تامر موجود .
تامر :ايه يابابا هو انا فاضي .
شوقي : مش انت لسة قايل ان ماعندكش امتحانات وما فيش مذاكرة دلوقتي .
عمر: هههههههه...ما تخافش يا تامر مش حنحتاجك .. انا ومحمد بنقوم بشغل عبد العزيز لغاية لما يرجع انشاء الله .
تامر وهو بيبص لعمر بنظرات شكر انه انقذه من الورطة اللي ابوه كان عايز يحطه فيها ...
شوقي : ربنا يوفقكم يا اولاد ويبارك فيكم انشاء الله .ماشي يابني مش عايز حاجة .. وسلم على الوالدة ومي .
عمر : شكرا يا عمي يوصل انشاء الله .
وخرج شوقي وابنه وراحوا للبيت
عمر راح لابوه واعطاه الاواراق ولاحظ عليه انه بجد تعبان ... ولازم يروح البيت عشان يستريح وبعد مناقشات ومحاولات مع عمر وابوه استسلم صلاح لالحاح ابنه ورجع للبيت لانه كان مرهق جدا .
وفي السيارة تامر ... اللي مشى السواق عشان هو اللي يوصل ابوه ....
تامر : شوف يابابا عايز اقولك حاجة وانشاء الله توافق .
شوقي : خير عايز ايه .. فلوس اعتقد اني محول لك في حسابك مبلغ مش صغير ..
تامر : لا يابابا مش ع ايز فلوس بس عايزك في موضوع كدة ..
شوقي : عايز ايه ...
تامر : اصحابي بعد ما يخلصوا امتحانات اخر السنة عايزين يروحوا جولة لاوروبا .... وكنت عايز اروح معاهم .
شوقي : ورايحين يعملوا ايه في اورويا .
تامر : مش حيعملوا حاجة دي فصحة .... سياحة يعني .
شوقي : يعني هي ما ينفعش الفصح في بلدك ما هي مليانة سياحة ولا لازم السفر كل سنة
تامر : يابابا الجو هنا بيبقى حر في الصيف
وبعد مناقشات تامر مع ابوه عشان يقنعه بالسفر ... وافق شوقي ان ابنه يسافر ... وقالوا انت ما بقت صغير واعمل اللي انت عايزة ...
تامر وهو فرحان ومبسوط ان ابوه وافق : خلاص يلا بقى يا ابو محمد حولي مبلغ على الحساب عشان السفرية .
شوقي : وليه تاني ماانا لسة محولك ... هو انت ما بتشيعش ..
تامر : يا بابا انا عايز مبلغ يكفي .. تذاكر وفندق وفسح .
تامر: يابابا المبلغ ما يكفى ..تذاكر وفنادق ودنيا..
شوقي : خلاص امري لله .... بس بشرط ما فيش سفر الا لما ترجع اختك سارة .
تامر : طبعا يابابا فاضل على نهاية الامتحانات حوال يشهر واسبوع واكيد حتكون رجعت .
شوقي : ماشي ربنا يسهل انشاء الله .
وفي لندن .....
..عبدالعزيز الي كان يحس بالذنب لانه ساب سارة لوحودها ... انا حرجع بدري عشان خاطرها ... شاف موبيله لقى عليه 3 مكالمات من رقم غريب .. المهم انه رجع وكان نسفه انها ما تكونش اتغدت عشان يخرجها ويغديها .... لسة ما جتش الساعة 3 الا وهو وصل الفندق ... اول ما دخل الريسبشن بلغة ان المدام خرجت وسابت الرسالة انها حترجع قبل ما توصل .....عبدالعزيز وهو مستغرب وسأل العامل هي طلعت مع حد ولو لوحدها ...قاله موظف الريسبشن خرجت مع بنت زيها ...قام عبد العزيز يفكر مين اللي تعرفها سارة هنا .... بجد كان شايل همها ...ورجع للجناح واستناها وقال لما ترجع حعرف هي راحت فين .... وطول الوقت كان بيفكر فيها وشاغل همها راحت فين دي .... وجات الساعة 4 .... وبعدين الساعة 5 ولسة الهانم ما رجعتش .....اكيد حصلها حاجة ... والشيطان بدأ يلعب يلعب في عقله ...وقعد يكلم نفسه ... البنت دي امانة عندي .. وانا ما حفظتش عليها .. كان حاسس بالذنب انه سابها لوحدها ... يارب كنت اعمل ايه بس ... سارة ا ول مرة تسافر وما تعرفش الامكان اللي في لندن .... وهي لسة صغيرة .. و مالهاش تجارب وياترى مين البنت اللي خرجتمعاها دي ....مش عارف يعمل ايه يخرج يدور عليها ولا يستنى شوية ولا يعمل ايه بس ....... قعد يدور في الاوضة بتاعتهم عن اي ورقة او رقم تليفون هي كانت كتباها ......وسأل موظف الريسبشن عن مواصفات البنت اللي خرجت معاها مراته ...الساعة بقت 6 ولسة سارة ما وصلتش وعبدالعزيز قرب يجنن ومش عارف يعمل ايه ولا يتصرف ازاي .. ...يارب ما يكونش حصل حاجة وحشة لسارة ... حقول ايه لاهلها بس .. حقولهم اني سيبتها في شهر العسل ورحت اخلص شغل قعد على السرير .. وقعد يمرر ايدهعلى شعره بتوتر .. اول مرة يحس بالخوف بالشكل دى ...الساعة بقت 6 ونص .. وبعد ربع سارة الباب اتفتح ودخلت سارة ....
..................................................
ياترى ايه حيكون رد فعل عبد العزيز لسارة ؟؟؟
وياترى ايه سبب تأخير سارة لغاية دلوقتي ؟؟؟

انتظروا الفصل الرابع